កន្លងទៅនេះ បេឡាជាតិសន្តិសុខសង្គម បានជូនដំណឹងឱ្យបានដឹងថា សមាជិក ប.ស.ស. ទាំងអស់អាចរាយការណ៍ទៅ ប.ស.ស. បានភ្លាមៗ តាមរយៈប្រអប់បណ្តឹងអនាមិក នៅពេលដែលសង្កេតឃើញមានភាពមិនប្រក្រតីណាមួយ របស់គ្រូពេទ្យ ឬ បុគ្គលិកមន្ទីរពេទ្យ ក្នុងការផ្តល់សេវាក្នុងអំឡុងពេលទៅប្រើប្រាស់សេវា ប.ស.ស. នៅតាមមូលដ្ឋានសុខាភិបាលដៃគូ ប.ស.ស.។
ក្នុងនោះ ដើម្បីរាយការណ៍ទៅកាន់ ប.ស.ស តាមរយៈប្រអប់បណ្ដឹងអនាមិក លោកអ្នកគ្រាន់តែចុចស្កេន QR កូដ រួចត្រង់ប្រអប់ «សុំប្ដឹងឈ្មោះ» លោកអ្នកត្រូវវាយបញ្ចូលឈ្មោះមូលដ្ឋានសុខាភិបាល ឬឈ្មោះបុគ្គលិកណាមួយ ក្នុងមូលដ្ឋានសុខាភិបាលដែលដែលលោកអ្នកចង់ប្ដឹង។
ចំណែកត្រង់ប្រអប់ «សូមរ៉ាយរ៉ាប់» លោកអ្នកត្រូវវាយបញ្ចូលបរិយាយពីសកម្មភាពមិនប្រក្រតី ឬការប្រព្រឹត្តខុសវិជ្ជាជីវៈនៃបុគ្គលនោះ បន្ទាប់មកសូមចុចប៊ូតុងពាក្យថា «បញ្ជូន»។
បន្ទាប់ពីបញ្ជូន លោកអ្នកនឹងទទួលបានលេខកូដបណ្ដឹង ដែលបញ្ជាក់ថាលោកអ្នកបានដាក់បណ្ដឹងដោយជោគជ័យ។
សម្រាប់ព័ត៌មានបន្ថែម សូមទំនាក់ទំនងទៅកាន់លេខ ១២៩៧ ឬ ១២៨៦ ឬតាមរយៈប្រព័ន្ធផ្សព្វផ្សាយបណ្តាញសង្គមរបស់បេឡាជាតិសន្តិសុខសង្គម៕
