ក្រសួងព័ត៌មាន និងគណៈកម្មាធិការជាតិប្រយុទ្ធប្រឆាំង អំពើជួញដូរមនុស្ស នៅថ្ងៃទី១៣ ខែវិច្ឆិកា ឆ្នាំ២០២៥នេះ បានរៀបចំវេទិកាផ្សព្វផ្សាយស្តីពី ការបង្ការ ទប់ស្កាត់ អំពើជួញដូរមនុស្សក្នុងវិស័យព័ត៌មាន។
កម្មវិធីនេះដែរ បានប្រព្រឹត្តទៅក្រោមវត្តមាន លោក កឹម គុណវឌ្ឍន៍ រដ្ឋលេខាធិការក្រសួងព័ត៌មាន និងលោកស្រី ជូន ប៊ុនអេង រដ្ឋលេខាធិការក្រសួងមហាផ្ទៃ និងអនុប្រធានអចិន្ត្រៃយ៍គណៈកម្មាធិការជាតិប្រយុទ្ធប្រឆាំងអំពើជួញដូរមនុស្ស គ.ជ.ប.ជ ។
ពិធីនេះក៏មានក្រុមអ្នកសារព័ត៌មាន អ្នកផលិតកម្មវិធីព័ត៌មាន អ្នកអានព័ត៌មាន ពិធីករ ពិធីការិនីវិទ្យុ ទូរទស្សន៍ សិល្បករ សិល្បការិនី និងអ្នកផលិតមាតិកាក្នុងបណ្តាញសង្គមចំនួន២៥០នាក់ ដែលបានចូលរួម។
វេទិកាផ្សព្វផ្សាយស្តីពី ការបង្ការ ទប់ស្កាត់ អំពើជួញដូរមនុស្ស ក្នុងវិស័យព័ត៌មាននេះ បានធ្វើឡើងក្នុងគោលបំណងលើកកម្ពស់ ការយល់ដឹង របស់អ្នកសារព័ត៌មាន និងអ្នកប្រកបការងារ ក្នុងវិស័យព័ត៌មាន ឱ្យកាន់តែយល់ដឹងអំពីទម្រង់ នៃសកម្មភាពជួញដូរមនុស្ស បញ្ហាប្រឈម និង ការបង្ការ ជាពិសេស គឺតួនាទីយ៉ាងសំខាន់របស់អ្នកសារព័ត៌មាន ក្នុងការចូលរួមផ្សព្វផ្សាយ ដឹងជូនដល់សាធារណជន ជាដើម៕
